Ahotsa irakaskuntzan – Asmoz-esko 2019ko jardunaldia

AURKEZPENA
Eskola-adinean dauden ia haurren erdiak (estatistiken arabera % 40 inguruk), ahots-arazoren bat dute; gainera, kontrolatu gabeko kasu gehiago ere egon daitezkeela uste da, azken hauetan alteraziorik antzeman ez delako. Afekzio horien jatorria hainbat faktoreen baturan dago, zarata mailan eta isiltasun faltan batez ere, alegia, ez du lotura zuzenik gertaera puntual batekin.

Bestalde, irakasleen ahotsa irakaskuntzarako erreminta nagusia den neurrian, bere erabilerak ahalik eta eraginkortasun handiena izan dezan baldintza jakin batzuk bete behar ditu. Tailerrean, eskoletan zein beste ahozko adierazpenetan, hura ahalik eta hobekien erabiltzeko gomendioak emango dira. Berau zaintzeko neurriak ere proposatuko dira, izan ere, neurri handi batean, fonazio-organoetako zenbait gaixotasun jakin, erabilera desegokiaren ondorioz ematen bai dira.

HARTZAILEAK
Ikaskuntza-irakaskuntza prozesuan, ahotsa behar bezala erabiltzeaz kezkaturik dauden pertsona guztiak, bai irakasleria zein familiak.

HELBURUAK
• Haurren ohiko ahots-arazo ohikoenen inguruan informatu eta horiek zuzentzeko jarraibideen berri eman.
• Irakas-lanean ahotsa nola zaindu behar den erakutsi era praktiko batean.

EGITARAUA
AURKEZPENA
16:30 Ongi etorria
16:45 Irekiera. Eusko ikaskuntzaren Asmoz Fundazioa

TXOSTENAK
17:00 Haurrengan ohikoak diren ahots-patologiak eta zuzentzeko jarraibideak
M. Perez
18:30 Ahotsa, irakaskuntza-jardueran zaintzeko gidalerroak
M. Dorronsoro

ITXIERA
20:00 Itxiera

FORMATOA
Hiru ordutako lan-jardunaldi praktiko bat proposatzen da (tailer moduan) bitan banatua eta irakasleen ahotsa zaintzera zuzendua. Jardunaldia Donostiako San Telmo museoan egingo da.

TXOSTENGILEAK ETA ZUZENDARITZA AKADEMIKOA
TOLARETXIPI TEJERIA, Iñaki
Ingeniaritza Industrialean Doktorea eta Euskal Herriko Unibertsitateko irakaslea da, baita Landarbaso Abesbatzako zuzendaria ere bere sorreratik. “Errenteria Musikal” Kontserbatorioan hasi zituen bere tronpeta ikasketak Donostiako Goi Musika Kontserbatorioan irakasle titulua lortu zuen arte Jose Mari Oiartzabalen zuzendaritzapean. Errenteria eta Donostiako kontserbatorioetan harmonia, kontrapuntoa, pianoa eta beste hainbat ikasketa egina da. Maisu handiek emandako ahots teknika eta abesbatza zuzendaritzako hainbat ikastarotan hartu du parte.

DORRONSORO AMIANO, Maddalen
Euskal Herriko Abesbatzen Elkarteak antolatutako hainbat zuzendaritza ikastaro egin ditu maisu handiekin eta Eusko Jaurlaritzak ematen duen egokitzapena du Musika eta Mugimendua (4-7 urte) eta Abesbatza alorretan. Gipuzkoako hainbat abesbatza zuzendu ditu eta 2009az geroztik Oiartzungo Lartaun Abesbatzako zuzendaria da. Haur zein gazte abesbatzekin 10 urtetik gorako esperientzia du eta 2016az geroztik Landarbasoko Dizdizka eta Kontariko arduraduna da.

PÉREZ GAZTELU, Mirari
Foniatra eta abeslaria, ahotsean espezializatutako profesional trebatua. Donostiako Aransgi zentroko zuzendari eta sendagilea da, kongresu eta ikastaroetan aditua eta gainera, Errenteriako Andra Mari Abesbatzako kide izan da eta gaur egun, Peñafloridako kaperako kide da.